IsiXhosa Intellectual Traditions (IsiXIT) Digital Archive

PEZOLO kuwe isitonga sokububa komnyaka we 1884, obulewe bubudala, nakukwalupala. Simncwabe kwa oko umhlobo wetu lowo. Zisanyakamile izandundu zetu zinyembezi zesisand' ukukwenza, kubete ixilongo ngelizwi elikulu,—elisankentezayo nangoku ngovuyo,—libika ukuba esikundleni somfi lowo, kuvele usana, itshaw'-inzwana! Sizisule buputuputu inyembezi. Kuvakele umzi uduma ngelizwi elikulu usiti,—' A ! 1885 ; PILA, LAULA : SIYAVUMA UKUBUSA KUWE! ' Sifane segovalala sikohliwe elona cala sifanele ukuhlomela kulo, liko elompanga, liko elovuyo. Kweso simo sicinge nzulu; yati into esuke yangummangaliso zafike ingcamango zetu zancenceza butandazora; kanti singaqondi nje kukubeka kwetu ilitye njalo encwabeni lo MFI ; kanti sitandabuza nje sigqibelisile ukumbulisa kwetu U-MFIKI lowo! Woti 'amen,' akuyi kutsho sinina, mfundi wetu, sakuba sikutyandel' igila lesikucamangileyo ngezo zihlo zozibini sizicancisileyo ngentl'apa, zikufikeleyo nawe kwa nje ngati? Asazi kambe. Kodwa kuti, njengoko sesitshilo, kuncenceze lomtandazo:— ' Siyakubulela, Wena, mang'-angabulelwa ; Wena Nyu- lushe ; Msweli-ka-tyala; Gquma-barwaqele ; Timla-betuke; Mtunzi wabo bonke bengaka nje. Sikubulela singobanina ke tina, ontliziyo-tye, abate nakuba utetile nati ngendlela ngendlela kunyaka odluleyo, asashukunyiswa noko. ' Sibulela ukuba ungasikalalanga, ungasitshicanga ko Wako umlomo ; usitwele wasitundeza ngelo tala lenceba Yako ; waze wasinqotola ngesibetelelo selizwi Lako ; wasipumeza kumazibuko amaninzi abesingena kuwawela; wasikokela kumatunzi amnyama, wakuba ube uhlwile ngakuti ngenxa yezigqito zetu. Usibambile ngengalo zetu, wasikupa kulo Nqab' -entandabuzo besitshixelwe kuyo, zizanzwili zozindlala, omalanga, ukubalela, ozingqakaqa, amare emfazwe; wasikupa ngengalo enamandla, wasigengela ezongcango; wasiposa pantsi kwepiko Lako. Siyakubulela Wena odale ozingwenya; o Canzibe, no Zilimela; sifihle pantsi kwelo piko Lako. Uti Wena wakuzongoma ngezwi lendudumo nokuba yeyendlala, mfazwe, buze, ntoni, sinyolule imiqala, kuba singa mantshontsho Ako, sibekise pakati kuyo lomi- bane, njengo Moses isicaka Sake. ' Sitandaza ukuti,—Nanko kambe, SOMBAWO, uze kusiti ngcam ngetala lenceba Yako emnyango ontsunguz' imnyama walomnyaka mtsha. Siti uzungene nati, ube ludondolo esakuhamba sisiva ngalo kwezi nzulu site tu kuzo zalo mnyaka siwusingeteyo. ' Asitsho sedwa, sitsho nentsapo zetu, nezihlobo, nenkosi zetu zawo onke amabala, nezikubupina ubume, sizile nazo Tixo—u Mntan'-omhle u VICTORIA, no sapo Iwake,—esitantaswe kunye nabo kulo eli tala, kwa nayo yonke imilondekaya. Sula ngezo zandla Zako lomkondo wetu sihambe ngawo ; wugquke lomkondo ngegazi Lako; ukuze usicimele lombalo ubusimele encwadini yokukumbula Kwako. ' Siyababika abaheyideni abasipahlileyo, siti nalo ibumba lozandla Zako. Linike, kuwo lomnyaka, ukuqonda ukuba Nguwe wedwa 'mnye umnqaki wento yonke pandle kweke- te, bashukumise, basabele Kuwe. ' Sikwalibika kuwe ilizwe elomileyo,—Siti Wena ungu Ngalo inemvula, una Cibi-la-Moya, una Gumbi-la-Busika. Panyaza, Mongamo, kade ute nzo ngalo iliso lelanga, akuko nto inokunyamezela, konke kuyatshabalala. Teta namafu ine imvula ziyatshabalala izinambuzane, nozinkumba; tetisa omibundane, neziboto, nezihlava, kwa nozixoshomba, sezisivuyelele ngati asinaye owasifelayo. Vula amaroba ezulu, sitululele kulo mvaba yezulu, sosela sonke zirucuze izisu. 'Sitandazela no ' Nyawo-ntle, abafundisi betu. O! hayi ububele Bako kuti, tina bomtina! Singo ni yenzanina, ebusweni Bako, ukude uze kusinukuza nati, tina ncakasana, kula mazala ezizono zetu; ude usitumele nezicaka Zako zokusishumayeza ezindaba zosindiso. Siti zixase kambe, zitwebule ngo MOYA Wako. Maucume, upuhle umsebenzi wezandla z.azo, ewe, mawupuhle, upuhliswe Nguwe. Bancedise kuwo onke amalinga okufundisa kwezi ntlanga zeli lizwe. Sikelela lonke ulutsha olusezimfundweni, nolungenjalo. ' Sikwelise kwelo tala Lako kwakona, ekungeneni kwetu kuwo lomnyaka, ukuze sikotame pantsi kwelo piko lobu Tixo Bako. Ungadinwa nangomso, nanini, Mhlekazi. Konke oku sikucela egameni lo Nyana Wako u YESU KRISTU,—Amen.