Kaimûs
Die name Keimasmund en Rooimond, -mund loop hier bietjie deurmekaar. Die Adressbuch gee Rooimund op as die jonger naam van Keimasmund. Waar die Topo-kadastrale kaart Keimasrivier het, het die ooreenstemmende Topografiese kaart 1973 weer 'Rooimondrivier', en waar die rivier uit die noordweste uitmond in die Oranjerivier, daar is hy Keimasmund, maar ook Rooimonddrif. Die bestanddeel Rooi- is hier pleknamig dominant. Op die plaas Keimasmund nr 98 is bv. 'Rooimond se Berge'; gedeeltelik oor die plaas vloei die genoemde 'Rooimondrivier'; wes van die rivier le 'Rooiberg', 965 meter hoog, dit troon uit ten noorde van die aangrensende plase Keimas nr 99 en Keimasmund nr 98, en is ’n uitstaande plek in die omgewing; oorkant die rivier in Kaapland le ong. 25 km suidoos van hierdie Rooiberg die 'Groot Rooiberg'. Nou weet ons dat hierdie rooi kleur bodembeskrywend is. Ook weet ons dat die lid Kei- primer 'vuur' beteken (in Nama gedevelariseer tot ǀae- (in Rynse spelling ǀai-), soos nog in Kora t'geys of ’kaip (HOTT 514) - die t’ en ’ voor die k is klapklankverteenwoordigers. Met velaar is die woord vir vuur dan ǀKae- wat ooreenstem met die Kei- van Keimas. Maar dit is nie die vuur wat hier meetel nie, dit is die rooi kleur van die vuurvlam. Die Rooiberg, Rooimond (d.i. uitmonding) verwys na die vuurrooi kleur, of die vlamrooi indruk. Hierdie gelukkige aanwysing het ons van mnr Hayes, eienaar van die plaas KEIMAS; kyk verder daar vir die lid -ma-s.